Ginreklamo sa subong sang isa ka concerned citizen ang suno pa overpricing nga transaksyon sa sulod sang opisina sang LTO Extension Office sa Gaisano Mall syudad sang Koronadal.
Sa isa ka social media post nga nagviral na sa subong, ginreklamo sang isa ka persona ang tuman ka mahal kag indi alalangay nga sahi sang balor sang kada transaksyon sa sulod sang nasambit nga opisina.
Suno pa sa iya, natabo ini makaligad nga wala nag santo ukon nag coincide ang balor nga iya nga na bayran nga P1,710 para sa iya nga license renewal nga layo sa P585 nga nakabutang ukon naka imprinta sa iya nga resibo.
Ginpahayag man sini nga nakasabay man sini ang isa ka persona nga may 10-year renewal nga lisensiya sa diin ginsukot sang P5,500.
Magluwas pa diri, ginpahayag man sini nga nagapaguwa naman sang resulta sang ang medical clinic nga ara lang sa tupad sang nasambit nga opisina apisar nga wala sang check-up nga natabo. Bangud sini, nagreklamo ang nasambit nga indibidwal sa diin natimbrehan man sang mga cashier kag ginbalik ang sobra sini nga kwarta.
Nagviral naman ang post sang nasambit nga persona kag madasig nga naka kuha sang mga nanari-sari nga komento online sa diin kasagaran diri amu ang naga pahayag nga masami nga talamak ukon lapnagon ang fixing sang pila ka mga fixer sa sulod sang opisina.
Bukas naman ang Bombo Radyo Koronadal para sa sabat sang Land Transportation Office XII sa sabat sa nasambit nga issue.
