KORONDALA CITY- Ginpaklaro sang South Cotabato Police Provincial Office nga isa ka lehitimo nga operasyon ang ila nga ginlunsar sa Purok Lower Cadidang,Brgy.San Jose Syudad sang Koronadal, kung sa diin nagresulta sa pagkapatay sang isa ka lalaki makaligad nga nagbato ini sa ma otoridad.
Ini ang ginkumpirma ni Pcol Samuel T Cadungon, ang Provincial Director South Cotabato Police Provincial Office sa interbyu sang Bombo Radyo Koronadal.
Suno sa opisyal, nagdepensa lamang ang mga otoridad sa ila nga kaugalingon makaligad nga nagbato si Rex Valeriano , 37 anyos, ang target sa operasyon.
Ginpaklaro sang opisyal, nga ang nasambit nga suspek ang ginaalegar nga nagpalupok sa isa ka katapo HPG-South Cotabato kag makapalagyo sang tinalikdan nga gab-i sa bahin sang Purok Tuburan sa Brgy.Sta.Cruz sa Syudad sang Koronadal.
Nahibaluan man nga siya isa ka anay nga preso kag involved sa drugs, estafa kag robbery, miyembro sang Gun for hire group kag dako nga grupo sang robbery-holdap.
Sa karon, nagapadayon pa nga gina imbestigahan sang mga otoridad ang mga kaupdanan sini kag napatay nga suspek kung siya ang imbolbado man sang naglabay lamang nga holdap incident diri sa siyudad sang Koronadal.
Sa karon, pahayag sang opisyal nga indi sila maga untat sa pagdakop sa mga persona nga nagalapas sa layi agud nga mangin tayuyon kag malinong lamang ang probinsya sang South Cotabato.
