Naplastar na ang Olympic rings sa popular nga Eiffel Tower sa Paris, France ensakto singkwenta (50) ka adlaw antes ang pagsugod sang Summer Olympics.
Naglab-ot sa 30 ka workers ang nagbuligay agud nga mabutang ang 29-by-13-meter rings nga human sa recycled steel. Gin-install ini sa idalom nga bahin sang nasambit nga iconic monument.
Ang Eiffel Tower ukon “Iron Lady” amo ang mangin center stage sa Olympics kag ang beach volleyball competitions naman ang patigayunon sa tiilan gid sini nga landmark.
Ang linibo naman ka fans ang magaplastar sa temporary Eiffel Tower Stadium sa Champ de Mars kun sa diin mahimo man maka-set up sang picnics ang Parisians kag mga turista.
Mangin ang mga medalya nga itakod sa winners sa Paris 2024 ang may pieces man sang steel nga kuha mismo sa amo nga tower.
Maga-arangka na ang Olympiada sa palaabuton nga Hulyo 26 tubtub sa Agusto 11.
