May persons of interest na ang pagluthang sa isa ka OIC Manager sang Bus Company kag isa ka anay barangay captain kag asawa sini matapos nga ginluthang patay sa kalabaon sang Y Junction, Barangay Kayaga, Kabacan, Cotabato subong nga hapon.
Ini ang ginkumpirma ni Plt James Warren Caang, ang spokesperson sang Cotabato PNP sa interbyu sang Bombo Radyo Koronadal.
Ginkilala ni Caang ang mga biktima nga sanday Armando Yap Lu, 79 anyos, OIC Manager sang Mindanao Star Bus Line, anay barangay captain sang Brgy. Ugalingan kag naging ABC president sang Carmen, samtang ang live in partner sini nga gikilala kay Marilyn Lunggakit, 62 anyos, kag lunsay mga residente sang Barangay Ugalingan, Carmen, Cotabato.
Suno kat Caang, nag gwas sa imbestigasyon nga sakay ang mga biktima sang Toyota Fortuner, duag grey nga ginabaybay ang highway halin sa Kabacan padulong sa Carmen sang hinali na lamang ini ginpusil-patay.
Sa inisiyal nga imbestigasyon, nakabaton na ang nasambit nga OIC manager sang isa ka bus line sang mga death threats angot sa ubra antes ini ginluthang patay kag naulamid lang sa pagpamusil patay ang live in partner sini bangud updanay ini sa salakyan.
May ara na sang CCTV footage apang hindi ini maklaro, may ara naman sang mga magatindog nga testigo nga nakakita sang krimen.
Nagpatigayon naman sang madalom nga imbestigasyon ang mga kapulisan nga madakop ang mga persons of interest kag agud mahibal-an ang sahi sang armas-luthang nga gingamit sa pagpangluthang patay sa mga biktima.
