Nagalab-ot ang kabalaka kag kahadlok sa pila ka mga Overseas Filipino Workers (OFWs) sa Qatar bangud sa padayon nga paglala sang tensyon sa Middle East kag sa pagbomba sang Iran sa mga critical nga lugar sa rehiyon.
Sa exclusive interview sang Bombo Radyo Koronadal kay Leizel Gullos, Bombo International News Correspondent to Qatar, ginpahayag niya nga bisan may mga pamahog sa seguridad, nagpabilin nga aktibo ang mga OFWs, lakip na ang mga health workers, kag nagapadayon gihapon sa ila mga trabaho.
Samtang, ginpahayag man ni Gullos nga wala pa sila nakabati sang bisan ano nga plano ukon programa bahin sa repatriation sang mga Pilipino nga nagatrabaho sa Qatar.
Apang suno sa iya, kun maglala pa ang sitwasyon sa rehiyon, may posibilidad nga mapilitan ang pila ka mga OFWs nga magpauli sa Pilipinas.
Bangud sini, nagpanawagan si Gullos sa gobyerno sang Pilipinas nga maghatag sang mas dako nga suporta ilabi na sa pinansyal nga aspeto sa mga OFWs sa Qatar, bangud sa nagataas ang presyo sang mga balaklon kag sa epekto sang padayon nga kinagamo sa rehiyon.
