Kanselado sa subong ang tanan nga klase sa tanan nga lebel sang mga buluthuan sa bahin sang punsod Israel bangud sa pag-atake sang pungsod Iran.
Ini ang nangin pahayag ni Ms. Elvie Aviador Pregua- Bombo International correspondent to Israel sa interview sang Bombo Radyo Koronadal.
Suno sa iya, temporaryo nga wala sang ginapatigayon nga klase sa pungsod bangud man sang kahagawa nga magsulod ang missile nga ginapadala sang Iran sa kahawaan sang pungsod nga mas makabutang sang peligro sang kabuhi sang mga kabataan kag mga manunudlo.
Dugang pa sini, nga bukas ang mga malls kag groceries sa ila nga lugar agud nga padayon nga makapamakal ang mga residente sang ila nga mga kinahanglanon labi na gid ang pagkaun nga ginadala naman sang mga ini masami sa ila nga bomb shelters agud nga preparahan ang mga madason nga mga inadlaw.
Suno pa sa iya, bukas ang mga ospital nga nahamtang man sa idalom sang bombshelter samtang naga padayon ang operasyon sang mga ini sa tion sang emerhensiya.
Ginpahayag man sini nga halos kada isa ka oras naga abot ang mga missile sa bahin sang Israel nga madasig naman nga madetect sang ila nga gobyerno kag gina-alarma ang mga pumuluyo sa lugar.
Dako naman ang pagasalig sang mga residente sa lugar sa Iron Dome sang Israel nga amu naman ang naga salo sang mga missiles sang Iran.
