Mapasinalamaton ang isa ka Overseas Filipino Worker (OFW) sa Israel sa padayon nga suporta kag pagpangamuyo para sa ila kaluwasan sa tunga sang nagapadayon nga tensyon sa Middle East.
Sa interview sang Bombo Radyo kay Arriane Gialogo, Bombo International News Correspondent to Israel, iya ginpahayag nga dako ang iya pagpasalamat indi lamang sa iya pamilya, kundi pati na sa tanan nga mga Pilipino nga nagapangamuyo kag nagasuporta para sa kaluwasan sang mga OFWs sa Israel.
Ginpahayag man ni Gialogo nga luwas sila sa Tel Aviv, bisan pa sa tunga sang mga pag-atake, bangud sa mga bomb shelter nga naga-proteher sa ila.
Gindugang pa niya nga sa tion nga magpadala sang warning alerts ang mga otoridad, kinahanglan nila magdali-dali nga magpanago sa bomb shelter, bangud may posibilidad nga mag-igo ang rocket ukon missile sa ila area sa sulod sang 10 minutos.
Bangud sini, nagpabilin nga alerto ang mga OFWs sa Israel bangud sa padayon nga tensyon sa Middle East.
