KORONADAL CITY– Tuman ang pagpasalamat sang isa ka Overseas Filipino Worker sa Saudi Arabia nga biktima sang hana nga pagpanglugos sang iya nga mga amo makaligad tigayon na nga nakapauli ini sa pungsod.
Nahibaluan nga personal nga nagpadulong sa waragwagan sang Bombo Radyo Koronadal si alyas Noraisa, 35 anyos nga residente sang Brgy. Centrala South Cotabato agud nga ipalab-ot ang iya nga pagpasalamat sa pagbulig sa iya sang Bombo kag ni Bombo Correspondent Boyet Forro sa pakig-angot sa Philippine Overseas Labor Office nga makaluwas sa nasambit nga sitwasyon.
Kaangot sini, kasubong nga nakuhaan naman san tunok sa dughan ang iloy sini kag ginakabig nga temprano nga regalo para sa paskwa ang pagkaluwas sang iya bata.
Madumduman nga sang tinalikdan nga semana sang magpalapit ang pamilya sang nasambit nga OFW sa Bombo Radyo agud nga masalbar ini sa kamot sang iya mga amo.
Nagpamalibad ang mga ini nga ibuyagyag ang ila identity sa publiko para man sa ila kaluwasan kag privacy sang pamilya.
Luyag naman ni Noraisa nga magsirbe nga leksyon sa mga may plano nga mag abroad ilabi na sa Middle East nga indi madali ang kabuhi sang isa ka OFW bangud nakataya dire ang ila kaluwasan kag kabuhi.
