KORONADAL CITY-Ginhangkat sang Obispo sang Diocese of Marbel ang mga katapo sang Sangguniang Panlalawigan sang South Cotabato nga mag-abstain ukon indi mag-entra sa pagboto sa pagdesisyon sa plano nga pagligwat sa pag-ban sang Open Pit Mining sa probinsya kun nagbaton na ang mga ini sang kwarta nagikan sa mining company nga SMI agud nga paburan ang pag-amendar sang Environmental code kag dulaon ang ban sang open pit mining.
Ini ang nangin pahayag ni Bishop Cerilo Casicas sang Diocese of Marbel sa ika-duha nga public hearing sa gina-proponer nga pag ligwat sa ban sang open pit sa probinsya.
Suno sa obispo, naga kaangay nga mag abstain nalang ang mga Board Members nga naga baton sang bayad halin sa mining firm lakip na man nga gin tumod ni Bishop Cerilo Casicas ang mga sponsors kag organizers sang hearing nga una na nga gin-alegar sang obispo nga naga pakita sang pagka-bias sa pagpabor suno pa sa mga speaker sang pro kumpara sa ila nga mga anti-mining supporters.
Gindugang pa sini, nga ang mga ginbaydan nga mga public servants ukon mga ginabaydan nga mga politiko ang masami nga mabulag sa pag implementar sang maayo nga mga butang kag bulag sa mga kalainan sa palibot nga masami nga magdala sang pagkaguba sa kina-iyahan.
