KORONADAL CITY – Nadugangan pa ang numero sang mga naospital bangud sa pagkahaklo sang ammonia tuga sang nagluntad nga leakage halin sa isa ka production plant sang isa ka fruit processing company sa Brgy. Cannery Site, Polomolok, South Cotabato.
Ini makaligad nagsaka sa 35 ang numero sang mga biktima halin sa anay 20.
Apang ginpaathag ni Polomolok Municipal Disaster Risk Reduction and Management Office (MDRRMO) head Rodelen Atimonan, nga 18 diri ang nakaguwa na sang ospital samtang ang nabilin nga 17 ang padayon sa gihapon nga ginaobserbahan.
Ini makaligad nagkasakit kag nabudlayan nga magginahawa ang mga biktima makaligad makahaklo sang ammonia nagikan sa nasambit nga planta.
Nakabalik man sa tagsa-tagsa nila ka panimalay ang 2,000 ka residente nga una nga ginbakwit.
Base naman sa ginpaguwa nga statement sang Dole Philippines Inc. (Dolefil), gilayon nila nga na-contain ang nasambit nga leakage bangud sang “temporary accidental ammonia release” halin sa isa nila ka pasilidad.
Nagapatigayon man ang nasambit nga kumbyohan sang imbestigasyon kun ano ang rason sang nasambit nga leakage.
