Nagpanugyan ang Energy Regulatory Commission (ERC) sa incoming Marcos administration nga ang pagdugang sang nuclear energy sa power mix sang pungsod ang posible makapanubo sa presyo sang elektrisidad sa pungsod.
Suno kay ERC chairperson Agnes Devanadera, kinahanglan matumod sang administrasyon kun ano ang energy mix — kun pila ka porsyento ang renewable energy, pila ka porsyento ang coal, pila ka porsyento ang biomass — kag dapat man suno sa iya nga ilakip ang nuclear bangud ang ginapangita sang pungsod amo ang reliable kag “reasonably priced source of energy”.
Suno pa kay Devanadera, ang nuclear energy amo ang posible makapanubo sa presyo sang kuryente apang indi man kinahanglan gid ang kaangay kadaku sang Bataan Nuclear Power Plant.
May yara man suno sa iya sang modular nga mas mahapos nga ipatukod.
Ginpahayag ini ni Devanadera matapos nga ginbutang sang National Grid Corporation of the Philippines (NGCP) ang Luzon Grid sa yellow alert status sa nagligad nga semana.
Buot silingon sini, may mas manubo nga reserves ang grid kun basehan ang deperensya sa supply kag demand. May yara ini sang 11,959 megawatts nga available capacity versus sa 11,350 megawatts nga peak demand.
Apang gin-athag man ni Devanadera sa Marcos administration nga posible malawig nga proseso ang pagbutang sang new sources of energy kaangay sang nuclear power.
Ini ang rason kun ngaa nga kinahanglan gid ang demand-side management.
Una na nga ginpahayag ni Department of Energy (DOE) Undersecretary Gerardo Erguiza Jr. nga padasigon nila ang paghimo sang regulatory framework sa paglakip sang nuclear energy sa power mix sang pungsod kag ginalauman man nga iga-adoptar ini sang next administration.
