KORONADAL CITY – Kasubong nga nagpakigdungan ang mga rebelde nga NPA sa natabo nga kinagamo sa siyudad sang Marawi nga gisulod sang Maute terror group agud nga hatagan sang dugang nga sakit sang ulo ang gobyerno.
Ini makaligad ang duha ka asod-asod nga pagsigabong sang Improvised Explosive Device (IED) kahapon sa probinsiya sang North Cotabato sa pihak sang curfew kag hugot nga seguridad nga ginapatuman sang kapulisan.
Suno kay PSSUPT. Emmanuel Peralta, provincial director sang Cotabato, kumpirmado nga grupo sang Guerilla Front 53 sang New People’s Army ang yara sa likod sang pagpasigabong.
Gintawag pa sini nga mga terorista nga extortionist ang mga rebelde nga nagpasigabong sang bomba nga ginkapilas sang 5 ka pulis kag isa ka sibilyan.
Madumduman nga una nga ginpalukpan ang patrol car sang Arakan PNP kahapon sang aga sa Barangay Binoligan nga ginkapilas ni PO1 Ronald Espanola kag sang isa ka sibilyan nga ginkilala nga si Mae Amerilla nga padulong kuntani sa CPPO Headquarters sa Barangay Amas.
Ginsundan ini sang isa pa ka paglupok sa dalan nga sakop sang Barangay Marbel, Kidapawan City pasado alas-3 kahapon sang hapon nga ginkapilas sang 4 ka mga pulis.
Sa subong, padayon pa nga nagapaayo ang mga pilason sa hospital.
Samtang, nagpanawagan namn sa publiko ang mga kapulisan nga magbulig sa mga otoridad agud madakpan ang mga suspek nga responsable sa pagpasigabong sang bomba.
