KORONADAL CITY- Ginaberipika sa subong sang Cotabato Police Provincial Office (CPPO) ang report kaangot sa ginahimo nga recruitment sang New People’s Army sa mga high school students sa probinsya sang North Cotabato bilang kabahin sang pagpabaskog pa sa ila nga grupo.
Ginpahayag ni Senior Supt. Emmanuel Peralta, provincial director sang CPPO, nga may nakuha rin sila nga report nga kadam-an subong sa miyembro sang NPA ang mga estudyante apang wala pa mahibaluan ang eksakto nga numero sang mga ini.
Ginpahayag naman sa isa ka interbyu ni Col. Harold Argamosa ang Commanding Officer sang 39th IB, Philippine Army nga suno sa ila nga monitoring aktibo subong ang presensiya sang rebelde nga grupo sa ikaduha kag ikatatlo nga distrito sang probinsya.
Sa subong, mas ginpahugtan pa sang militar kag kapulisan ang ila operasyon batuk sa NPA agud mapunggan ang anuman nga kinagamo nga ila plano himuon.
