KORONADAL CITY- Nagtuga sang tuman nga kahadlok ang nagluntad nga engkwentro sa tunga sang katapo sang 27th Infantry Battalion Philippine Army kag mga katapo sang NPA makaligad ang ginlunsar nga pagpang atake sang NPA sa CAFGU detachment sa Brgy. Tablu, Tampakan South Cotabato.
Sa interbyu sang Bombo Radyo Koronadal kay South Cotabato Police Provincial Director Senior Superintendent Franklin Alvero, tuman nga ginkaalarma ang bakbakanay sang militar kag NPA kun sa diin sa subong padayon pa nga ginahibalo kun may yara sang napilasan ukon napatay.
Ini kasunod sang pagpang atake sang rebelde nga grupo nga nagsugod sang kaagahon kun sa diin una na nga nag atras ang rebelde sang mag abot ang 27th IB apang liwat naman nagbalik takna alas 8 kag nagpatigayon sa liwat sang pagpang atake.
Pila ka residente man ang nagpalab-ot sang mensahe sa Bombo Radyo nga nahadlok sila bangud sa nilukpanay nga nabatian.
Ginkonder naman ni Col. Alvero ang kinagamo nga gintuga sang rebelde sa nasambit nga banwa.
