Ginpasiguro sa subong sang Norala PNP nga mangin malinong ang ila sini nga pagpatigayon sang kapiyestahan sa ila nga banwa makaligad ang issue nga ginapangatubang sang isa ka vlogger nga si Evangeline Dapilaga Limpoac ukon si “Inday Pasayan” sa diin nag agaw sang atensiyon indi lang taga banwa sang Norala kundi mangin man sa social media.
Sa interview sang Bombo radyo Koronadal kay PMaj Joseph Paulo Villanueva -Chief of Police, Norala MPS ginpahayag sini nga wala sang anu man nga dapat kabalak-an ang tanan bangud kontrolado sang kapulisan ang sitwasyon sa lugar.
Dugang pa sini nga napatawag naman sa ila nga estasyon ang nasambit nga vlogger sa diin nagluntad sang gin hiwat ang “Nilagumba sa Dalan.”
Base man sa nagalapta nga videos online, nagpaligo kag nagpamasa ang nasambit nga vlogger sa pila ka mga nagatambong sa nasambit nga event.
Magluwas sini, makita man nga naka two piece lang ini kag nagsaka pa sa steel truss sang suga sang discohan agud nga makakiha sang atensiyon sa publiko.
Ginpahayag man ni Villanueva nga sa idalom sang makahulubog nga ilimnon ang nasambit nga vlogger samtang naga himo sang content sini sa social media.
Voluntaryo man nga nagpakita ini sa mga kapulisa kag ginpa-intindi man sang mga otoridad nga indi manami ang nasambit nga aktwasyon sa nasambit nga lugar.
Madumduman nga ginkondena man sang Sangguniang Bayan (SB) sang Norala ang nasambit nga aktwasyon sang vlogger nga suno pa sa ila isa ka aktuwasyon nga indi naga kaangay nga ipakita sa publiko.
