Gin-admitar sang Koronadal City Police Station nga madamo ang violators sa tion sang pagsaulog sang T’nalak Festival apang, ginpaklaro niya nga nagbalik na ang hugot nga implementasyon sang no helmet, no travel policy sa Syudad sang Koronadal matapos ang pagtapos sang selebrasyon sang T’nalak Festival 2026.
Sa interview sang Bombo Radyo Koronadal, ginpahayag ni PLt. Col. Harold Cornel, Chief of Police sang Koronadal City PNP, nga ginluagan anay sang mga otoridad ang pagpatuman sang polisiya sa tion sang festival bilang konsiderasyon sa madamo nga mga bisita kag sa nagkatinapok nga mga aktibidad.
Apang suno kay Cornel, pagkatapos sang selebrasyon nagbalik na ang regular kag hugot nga pagpatuman sang no helmet, no travel policy agud masiguro ang kaluwasan sang mga motorista kag ang kalinong sa dalanon.
GinDugang pa niya, ginatun-an man sang Koronadal City PNP ang posibilidad nga mas hugtan pa ang pagbantay sa mga entry points sang siyudad sa masunod nga mga dalagko nga okasyon agud malikawan ang mga paglapas sa mga polisiya sa trapiko.
