KORONADAL CITY – Natumod na sang mga otoridad ang salakyan nga naka-hit-and-run sa isa ka tricycle sa banwa sang Tantangan, South Cotabato sang tinalikdan nga adlaw.
Ini ang ginkumpirmar ni PMaj. Romeo Albano Jr., hepe sang Tantangan Municipal Police Station sa interview sang Bombo Radyo Koronadal.
Suno kay Albano, nakakuha na ang mga imbestigador sang CCTV footages kag natumod na ang salakyan nga naka-hit and run sa tricycle nga ginasakyan sang magkapamilya nga Albento nga gintunaan sang kamatayon sang isa kag ginkapilas naman sang duha ka iban pa.
Natukiban man sang mga otoridad nga may nagkalain-lain na nga tag-iya ang salakyan nga Nissan Terra nga nagaduag sang Gray kag narekober sa General Santos City.
Dugang pa ni Albano, indi pa sila makakuha sang personal nga impormasyon sang tawo nga nakabakal sang salakyan bangod ang tag-iya sang car trading yara pa out of town.
Sa kuha nga CCTV fooatge, madasig ang dalagan sang salakyan kag sang nag-overtake ini nabungguan sini ang tricycle sa tuo nga bahin, gani nagtabog ini sa rightmost lane sang dalanon kag nagtalabog man ang driver kag sakay sini.
Sa subong, padayon pa ang madalom nga imbestigasyon sang Tantangan PNP agud matudlo kon sin-o ang ulihi nga nag-maneho sang SUV ilabi na sang nagluntad ang aksidente.
Madumduman nga ginbawian sang kabuhi si Ginang Juliet Albento, samtang pilason naman ang bana sini nga si Edgar Albento nga lunsay residente sang Barangay Tambak, Lambayong, Sultan Kudarat.
Kalakip man sa napilasan ang hinablos sang mga ini nga si Jeric Albento, 38 anyos, residente man sang nasambit nga lugar nga ang drayber sang tricycle.
Nahibaluan nga lunsay nagapadulong sa siyudad sang Koronadal ang Nissan kag tricycle sang magluntad ang aksidente.
