KORONADAL CITY- Ginakabalak-an subong ang kaluwasan sang nilibo ka mga trabahante nga mga Pilipino nga nagatrabaho sa state-owned Saudi Aramco oil facilities makaligad ang nagluntad nga pagpasigabong sa nasambit nga planta.
Sa ekslusibo nga interbyu sang Bombo Radyo Koronadal kay Bombo International Correspondent Boyet Forro, yara sa masobra 40% sang kabug-usan nga numero sang mga nagatrabaho sa Aramco ang mga Filipino skilled workers.
Dugang pa sini nga dako ang nakontribwer sang mga trabahante nga mga Pilipino sa operasyon sang isa sa pinakadako nga producer sang langis bug-os nga kalibutan apang nagakabalaka sa ila kaluwasan.
Samtang sa pihak sang nagluntad nga pag-atake, wala naman sang napilasan ukon napatay kun sa diin ginpasiguro sang Saudi Government nga kontrolado nila ang mga panghitabo kag may aksyon na nga ginahimo agud matumod kag mapasabat ang yara sa likod sang pag-atake.
Madumduman nga nagpagwa naman sang pahanumdom ang Philippine Embassy sa Riyadh nga nagapakig-angot na sila sa mga Pilipino ilabi na ang mga nagatrabaho sa Aramco agud mapasiguro ang ila kaluwasan.
Ginlaygayan man ang mga Pilipino sa Saudi nga magpabilin nag kalmado kag vigilante.
