Ginahatagan importansya ni National Irrigation Administration (NIA) Administrator Eduardo Guillen ang importansya sang mga dam sa flood control ukon pagpugong sa mga pagbaha sa tunga sang pagpakawala sang tubig sang mga dam sa Luzon.
Suno kay Guillen, bisan pa sang pagpagawas sang tubig sa mga dalagko nga dam, dako nga bulig ang mga ini para makontrol ang hinali nga pagbaha sa mga mababa nga lugar.
Gin-ehemplo sang opisyal ang mabaskog nga mga ulan nga naeksperyensyahan sa madamo nga mga lugar sa northern Luzon, ilabi na sa Cordillera kag Cagayan Valley kon sa diin naghimo ang mga dalagko nga dam nga ma-contain ukon mahawakan ang dako nga bulto sang tubig.
Ginpahayag ni Guillen, kon indi mapunggan nga mag-agos ang mga tubig sa mga balay, posible nga mahitabo ang flash flood ukon hinali nga pagbaha sa mga mababa nga lugar samtang sa bulig sang mga dam, nagakontrol pa gihapon ang mga ini nga tubig sa bulig sang mga dalagko nga reservior.
Bisan pa nga padayon nga ipagawas ang tubig nga natipon sa mga dam, ginpahayag ni Guillen nga kontrolado ang pagpagawas sang tubig kag hinay agud indi mangin kusog ang paglobo sang tubig.
Sa sini nga paagi suno sa iya, nagakontrol ang mga dam sa mga hinali nga pagbaha, maliban pa sa bulig sang mga ini sa irrigasyon kag power generation.
