TBOLI, SOUTH COTABATO – Ginpakigbahin ni T’boli, South Cotabato Mayor Dibu Tuan nga nangin emosyonal ang komemorasyon sang ika 24 na nga anibersaryo sang Lake Maughan Tragedy sa nasambit nga banwa.
Sa interbyu sang Bombo Radyo Koronadal kay Mayor Tuan, pila sa mga naghatag sang mensahe kag testimonya amuh ang mga katigulangan nga survivors sa nasambit nga trahedya.
Dugang pa sini may pila man ka mga indibidwal ang naghilibion sang madumduman ang masubo kag makaharadlok nga panghitabo bangud sa ila pamilya siya na lamang ang nagaisahanon nga survivor.
Madumduman nga sang Setyembre 6, 1995, ang Lake Maughan sa baba sang Mr. Parker sa banwa sang Tboli, South Cotabato ang nag awas kun sa diin masobra 30 million cubic meters sang tubig ang nagbaha.
Base opisyal nga datus sang Provincial Disaster Risk Reduction and Management Office, ang pagbaha ang nag-utas sang kabuhi sang 53 ka persona, 14 ang missing samtang masobra P278 million naman ang balor sang imprastraktura kag agricutural crops ang naguba.
Ang tubig sang Lake Maughan ang nakalab-ot sa 130 kilometros nga naga apekto sa probinsya sang South Cotabato, Sultan Kudarat, Maguindanao kag Cotabato City base man sa report sang National Disaster Coordination Council ukon NDRRMC sang 1996.
Madumduman nga natukiban sa imbestigasyon nga an crater sini ang nagcollapsed bangud sa gina alegar nga treasure hunting activities nga ginakaulamiran pa sang pila ka mga lokal nga opisyal sa South Cotabato.
Samtang sa karon ginaduso naman ni Mayor Tuan nga magpatigayon na sa masunod sang festival sa baylo nga komemorasyon sang masubo nga panghitabo agud makakas ang trauma sa mga nabilin nga pamilya ukon survibors sa Lake Maughan tragedy.
