Indi kumporme si Israeli Prime Minister Benjamin Netanyahu nga mauntat ang giyera sa Gaza. Ini ang kasunod sang pahayag sa telebisyon sang lider nga magapasugot lamang siya sa “partial” cease-fire kag indi sa pag-untat sang giyera sa Gaza.
Luyag sini nga mabalik ang kapin 120 ka bihag nga Israeli nga uyat pa sang grupo nga Hamas sa Gaza strip, apang kun matapos na, padayunon sini ang pagpulbos sa Hamas.
Ang pahayag ni Netanyahu ang baliskad naman sa luyag matabo sang Estados Unidos sa pagpanguna ni President Joe Biden kag ginakabalak-an nga magahatag ini sang lamat sa relasyon sang prime minister sa Amerika.
Nauna na nagpanindugan ang Hamas nga indi sini pag-ihilway ang nabilin nga mga bihag kun wala sang permanente nga cease-fire kag magbiya na sa Gaza ang tropa sang Israel.
