KORONADAL CITY – Nagapadayon ang imbestigasyon sang mga otoridad angot sa nagluntad nga pagpangluthang sa Prk. San Francisco, Brgy New Pangasinan, Koronadal nga ginkapatay sang isa ka persona.
Ginpahayag ni Koronadal PNP chief of police Lt. Col. Joefel Siason nga ginkilala ang nasambit nga biktima nga si Johnny Astrologo, 29 anyos, isa ka negosyante kag residente sa banwa sang Tampakan, South Cotabato.
Base sa imbestigasyon, halin sa Brgy. San Roque ang nasambit nga biktima sakay sa Isuzu elf kag pakadto kuntani sa Tampakan sang gin-overtakean sang Innova nga salakyan kag ginluthang si Astrologo.
Naigo sa nagkalain-lain nga bahin sang lawas si Astrologo nga nangin kabangdanan sang iya kamatayon.
Suno kay Siason, narekober sa crime scene ang kalibre 45 nga mga armas kun sa diin base sa mga testigo, wala suno pa naka-bonnet ang nasambit nga mga suspek kag ginapatihan nga isa suno pa ka babaye ang driver sang Innova.
Sa subong hugot ang ila ginapatuman nga seguridad makaligad ang nasambit nga pagpangluthang sa tunga sang modified general community quarantine (MGCQ).
Tuman ang kasubo kag wala ginalauman sang pamilya ni Johnny nga tigayon nga madula sa ila ang ila himata nga biktima sa pagpangluthang.
Suno kay alyas Cham, asawa sang biktima, wala suno pa sang anuman nga kasumpong ang iya bana gani tuman na lamang ang iya kakibot kag kasubo sang nahibaloan nga gintadtad sang bala sang wala pa natumod nga mga suspek nga ginapatihan nga nakasakay sa Innova nga salakyan.
Hustisya naman ang ila ginapanawagan kasunod sang natabo.
Nahibaloan nga may bata sila ni Astrologo gani ini subong ang iya ginapaminsar kun paano buhi-on ang lapsag subong nga wala na ang amay sini.
Base sa mga testigo nakapalagyo suno pa ang helper nga kaupod ni Johnny kag wala pa nakita sa sini nga mga tinion bangud sa kahadlok nga posible nga balikan sang mga suspek kag nahadlok para sa iya seguridad.
