KORONADAL CITY – Arestado ang isa ka negosyante sa ginpatigayon nga operasyon sang kapulisan sa Purok Paghili-usa, Barangay Topland, Siyudad sang Koronadal City matapos maaktuhan sa pagbaligya sang illegal nga sigarilyo.
Ini ang nangin kumpirmasyon ni Police Captain Ralph Marvin Francis Rivera, spokesperson sang Koronadal City PNP, sa interview sang Bombo Radyo Koronadal.
Suno kay Rivera, ang naaresto nga suspek ang ginkilala kay alyas “May,” nga residente man sang amo man nga lugar, kun diin nakumpiskar sa tindahan sini ang karton-karton nga smuggled nga sigarilyo.
Naglab-ot sa 100 rim sang Berlin cigarettes kag 100 rims sang Canon Menthol cigarettes nga may kabug-osan nga market value nga P120,000 ang nakuha sa posisyon sini.
Sang ginpangayuan sang dokumento, wala ini sang mga napresentar nga magapamatuod nga authorized dealer siya sang nasambit nga mga produkto, rason nga ginaresto ini sang kapulisan.
Gilayon naman nga ginturn-over sang kapulisang ang mga nakumpiskar nga mga smuggled nga sigarilyo sa Bureau of Customs.
Sa karon, yara na sa kustodiya sang Koronadal City Police Station ang nasambit nga suspek kag magapangatubang sang nagakaangay nga kaso.
