KORONADAL CITY-Nagpatunga na ang Lokal nga Gobyerno sang Datu Saudi Ampatuan, Maguindanao sa nagalala nga tensyon sa tunga sang duha ka armado nga grupo sa lugar.
Sa interbyu sang Bombo Radyo Koronadal kay Capt. Arvin John Encinas, tigpamaba sang 6th ID, PA, ginpahayag sini nga madugay na nga naga away ukon may redo ang duha ka grupo kag liwat nga nag-ibwal ang kinagamo.
Nahibaluan nga sang dominggo liwat nag-ibwal ang kinagamo tubtub kaina sang kaagahon nga rason sang pagbakwit sang halos 900 nga indibidwal sa Sitio Madap, Brgy. Madia sa nasambit nga banwa.
Sa subong nagapadayon ang monitoring sang militar agud indi na masundan pa ang nasambit nga kinagamo.
Samtang nagpahayag naman ini sang kabalaka sa mga displace nga mga residente nga subong nagapabilin sa mga buluthuan.
Plano man sang LGU kaupod ang militar kag opisyal sa lugar nga magpatigayon sang negosasyon agud matulduldukan na ang madugay nga inaway sang duha ka grupo nga lunsay miyembro sang Moro Islamic Liberation Front ukon MILF.
