Ginakabalak-an sang National Bureau of Investigation (NBI) ang kadaku kag kadamuon sang impormasyon nga posible nga nakuha ukon nakolekta sang isa ka Chinese national nga nadakpan malapit sa opisina sang Commission on Elections sa Intramuros, Manila.
Nadumduman nga nakuhaan sang suspek ang isa ka device nga ginatawag nga International Mobile Subscriber Identity (IMSI) catcher isa ka kagamitan nga may kapasidad nga magkuha ukon mag-intercept sang phone communications sulod sang pila ka kilometro nga radius.
Suno kay NBI spokesperson Ferdinand Lavin, padayon nga ginausisa ang mga nadakpan nga device kag mga kagamitan halin sa suspek agud matukiban ang kahalapad sang operasyon sini kag kon pila ka impormasyon ukon datos ang nakuha gamit ang IMSI catcher.
Dugang pa ni Lavin, ginasiling nga nakaagi na ang suspek sa mga importante nga government infrastructure kag military facilities.
Upod sa mga lugar nga ini amo ang Villamor Airbase, pila ka naval station, seaport, central office sang Department of Justice, Bureau of Internal Revenue, kag ang US Embassy sa Manila.
Luwas pa diri, ginasiling nga makadamo nga beses nga naglibot ang suspek sa central office sang Comelec sa Intramuros pila ka adlaw antes siya nadakpan sang mga law enforcers kag NBI agents.
Subong, ginatan-aw pa sang NBI kon ginabaligya bala ang mga nakuha nga datos kag kon sa sin-o ini ginahatag.
Ginatan-aw man sang ahensya kon ginagamit bala ini sa mga paagi nga mahimo magdala sang peligro sa nasyonal nga seguridad kag sa mga aktibidad sang pungsod.
Ang klaro subong, suno kay Lavin, amo nga nagamit na ang IMSI catcher nga nakuha halin sa salakyan sang nasambit nga Chinese nga persona.
