Naghingyo si National Bureau of Investigation (NBI) Director Melvin Matibag sa House prosecution panel nga himuon trimpano ang iskedyul sang iya pagtestigo sa impeachment trial ni Vice President Sara Duterte agud indi madelatar ang pagpadayon sang hearing.
Sa sulat nga ginpadala niya kay lead prosecutor kag Batangas Rep. Gerville Luistro, ginpahayag ni Matibag nga kinahanglan niya magtambong sa summit sang mga lider sang law enforcement sa Thailand sa Hulyo 21 kag 22.
Bangud sini, ginpangayo niya nga makaatubang siya sa Senado antes ang Hulyo 20.
Suno kay Matibag, siya mismo ang magarepresentar sa NBI sa amo nga pagsinapol upod sa mga opisyal sang Federal Bureau of Investigation (FBI) kag Royal Thai Police parte sa mga scam kag transnational organized crime sa Asia-Pacific nga rehiyon.
Ginpaathag niya nga kinahanglan mapauna ang iya testimonya agud indi maapektuhan ang dalagan sang impeachment proceedings.
Ginapaabot nga magahatag si Matibag sang impormasyon parte sa imbestigasyon sang NBI sa gin-alegar nga pagpamahog ni Duterte batok kay Presidente Ferdinand Marcos Jr., First Lady Liza Araneta-Marcos, kag anay House Speaker Martin Romualdez. Ini nga alegasyon isa sa mga ginbasehan sang Articles of Impeachment nga ginfile batok sa bise presidente.
