KORONADAL CITY– Natalana nga pasakaan sang kaso nga pagbayular sa Comprehensive Dangerous Drugs Act of 2002 ang ginakabig nga Narco-Businessman nga ntikma sang Philippine Drug Enforcement Agency ukon PDEA-12 sa syudad sang Koronadal.
Una sini, ginbuyagyag ni PDEA-12 Regional Director Gil Cesario Castro nga miyembro suno pa sang isa ka dako nga drug ring sa Rehiyon 12 ang naaresto nga negosyante nga ginkilala kay Alvin Keith Valerio.
Magluwas diri, ginpahayag man sa Bombo Radyo Koronadal ni Director Castro nga myembro suno pa ini sang El Patron Drug Group nga isa ka grupo sang mga dalagko nga drug lords sa Rehiyon.
Nahibaluan nga ang El Patron Drug Group ang ginalakipan sang mga drug pushers nga naga-operate sa Region 12 partikular na sa mga probinsya sang South Cotabato, General Santos City kag Sultan Kudarat.
Dugang pa sini nga si Valerio ay kaupod man sang mga bigtime drug lord kag negosyante nga si Balong Espinosa kag Maasim Mayor Anecito Lopez Jr. nga mga financer man suno pa sang droga.
Kun madumduman, nakuha sang PDEA-12 ang halos P1 milyon nga balor sang shabu, mga armas kag iban pa nga drug paraphernalia sa posisyon ni Valerio.
