Madinalag-on nga nadakpan sang mga otoridad ang isa ka field commander sang Bangsamoro Islamic Freedom Fighters (BIFF) kag ang kaupod sini nga isa medic sa ginpatigayon nga Joint Law Enforcement Operation sa Brgy. Bonao, Tupi, South Cotabato.
Ginkilala ni Lt. Col. Al Victor C. Burkley, Commanding Officer sang 6th Infantry (Redskin) Battalion ang mga naarestar nga sanday Omar nga Field Commander sang BIFF–Bungos Faction kag si Rowaida nga ginakabig naman nga medic sang ila nga grupo.
Suno kay Brig. Gen. Omar V. Orozco, Commander ng 1st Mechanized Brigade ang duha ka mga suspek nga nagapangatubang sang nagkalain- lain nga kaso lakip na ang Multiple Attempted Murder, Destructive Arson, kag paglapas sa Anti-Terrorism Act of 2020.
Ginhimo ang pag-aresto sa gahom sang warrant of arrest nga gin-issue kag gin implementar sang Tupi Municipal Police Station kaupod na ang mga elemento sang 6IB kag 1st Mechanized Brigade.
Sa ginhimo nga operasyon , nakuha sa paghinakop sang mga suspek ang isa ka Caliber .45 pistol nga may isa ka magazine kag isa ka granada.
Gindayaw naman ni General Jose Vladimir R. Cagara, ang Commander ng 6th Infantry (Kampilan) Division kag Joint Task Force Central ang madinalag-on nga operasyon sang AFP kag PNP.
Padayon naman ang pagpasangad sang operasyon sang mga otoridad agud nga mapabilin ang kalinong kag katawhayan sa bilog nga Area of Responsibilty sang Kampilan Division.
