Liwat nga napanabat sang Sandiganbayan si Janet Lim-Napoles, gintawag nga “pork barrel scam queen,” may kaangtanan sa paggamit sang Priority Development Assistance Fund (PDAF).Sa ginpaguwa nga desisyon, napamatud-an nga guilty si Napoles sa mga masunod: Graft, duha ka bilang sang malversation of public funds kag duha ka bilang sang falsification of public documents.
Kaupod sa nahatulan amo sanday: ang pangulo sang National Livelihood Development Corporation kag si Michael Benjamin, anay political affairs chief ni anay Senador Gregorio ‘Gringo’ Honasan. Ang kaso may kaangtanan sa ginpahayag nga pagbalhin sang pondo halin sa PDAF padulong sa mga peke nga NGO nga ginapamunuan ni Napoles, kabaylo sang ginpahayag nga kickbacks.
Isa ini sa mga nabilin nga kaso nga may kaangtanan sa malapnagon nga pork barrel scam nga nagtay-og sa pungsod sang dekada 2010.
