Gin-cite in contempt sang mga mamalidha sa Kamara si National Police Commission (Napolcom) Commissioner Edilberto Leonardo kag ginmandu ang pag-detain sa iya bangud sa gina-alegar pagbinutig sa nagapadayon nga hearing sang drug war deaths.
Si Leonardo ang ginapa-priso sa Batasang Pambansa Complex sa Quezon City bangud sang iya mga pahayag nga nagpanginwala nga may pagsinapol nga natabo antes ang pagpatay sa tatlo ka Chinese drug convicts sa Davao Prison and Penal Farm sang Agosto 2016.
Ang meeting ang ginapahayag nga natabo sa Davao City Criminal Investigation and Detection Group (CIDG) office kag gintambungan nanday anay Davao Prison and Penal Farm chief Gerardo Padilla kag retired police colonel Royina Garma.
Si Abang Lingkod party-list Representative Stephen Paduano nga chair sang House Committee on Public Accounts, ang nagduso sang motion nga i-contempt si Leonardo nga ginsuportahan man ni Antipolo Representative Romeo Acop.
Gin-aprubahan naman ni Surigao del Norte Representative Robert Ace Barbers nga overall chairman sang Quad Comm ang amo nga motion.
Sa nagligad nga hearing, ginpahayag ni Padilla nga ginpahibalo sia nanday Garma kag Leonardo may kaangtanan sa kill job sa tatlo ka Chinese convicts sa ginpatigayon nga CIDG meeting. Si Garma ang gin-appoint bilang general manager sang Philippine Charity Sweepstakes Office sa tion ni anay President Rodrigo Duterte.
Apang suno kay Leonardo, wala sang natabo nga meeting.
