KORONADAL CITY – Nagpanindugan ang pamilya sang isa ka sultirito nga nareport nga napatay sa engkwetro sang militar kag rebelde nga NPA sa Senator Ninoy Aquino, Sultan Kudarat kundi isa ka ordinaryo nga katapu lamang sang OMI Indigenous Peoples Mission.
Ginkilala ang napatay nga si Eusibio Cranzo alias “Kuni”, 16-anyos nga miyembro sang Manobo-Dulangan tribe, mag-grade 10 na kuntani sa madason nga klase sa idalom sang IP scholarship program.
Suno sa panaysayon sang utod sini kag duha ka kaupdanan, nagalakat lamang sila papule sa ila nga lugar gikan sa kaiping nga barangay sang masugata ang mga suldado sang 7th Infantry Batallion.
Gilayon nga ginpalukpan sang mga suldado ang tatlo (3) apang naglumpat ang mga ini sa kilid sang bukid kag nagpanaug sa maisan agud makaluwas.
Apang, napatay sa military operation si Kuni kag ginbansagan nga myembro sang NPA sa Sitio Kiluding, Barangay Kiadsam.
Samtang suno naman kay Oblate Brother Kelly Mark Socias nga naka-assign sa OMI IP Ministry sa Kulaman, masakit para sa mga ginikanan sini ang natabo kay Kuni.
Gin-insister sang iya mga ginikanan nga si Kuni isa ka ordinayo nga sulterito kag indi konektado sa NPA.
Madumduman nga ginkumpirmar mismo sa Bombo Radyo ni Lt.Col. Roden Orbon, tigpamaba sang 6ID, Philippine Army nga ang napatay nila sa operasyon katapu sang rebelde.
Sa subong, may amicable settlement na sa tunga sang mga ginikanan sang biktima kag mga suldado matapos magpatunga si Senator Ninoy Aquino (SNA) Mayor Randy Ecija Jr.
