Napatay ang isa ka highranking official sang rebelde nga NPA kag isa pa ka babaye nga kaupod sini sa nagluntad nga engkwentro sa tunga sang militar kag yara sa masobra napulo ka mga NPA sa Brgy. Salansang, Lebak, Sultan Kudarat.
Ini ang ginkumpirmar ni Major Elvis Dela Cruz, spokesperson sang 603rd Brigade, Philippine Army sa interview sang Bombo Radyo Koronadal.
Ginkilala ni Dela Cruz ang napatay nga opisyal sang NPA nga si Reyjan Villegas ukon kilala man bilang Alberto nga katapu sang executive committee sang Sub-Regional Command (SRC) – Daguma of Far South Mindanao Region (FSMR) kag nagaserbe nga deputy secretary general, isa man ka political instructor, in-charge sa pagkolekta sang revolutionary tax kag may patong sa ulo nga isa ka milyon.
Samtang, ang babaye nga kaupod sini nga napatay sa pagpakig-engkwentro sa militar ang wala pa makilala tubtob sa karon.
Dugang pa sang opisyal, nagpatigayon sang decisive military operations ang tropa sang gobyerno sang makabaton sang report gikan sa mga sibilyan angot sa ginahimo nga pagpangilkil ukon ‘extortion activities’ sang mga terorista nga komunista sa lugar.
Kaupod sang 57th IB sa operasyon ang 37th IB, 7th IB kag iban pa nga operatiba sang militar sa ginlunsar nga operasyon batuk sa mga terorista nga nagresulta sa pagka-neutralisa sang duha nila ka mga kaupdanan sa Sitio Laman sang nasambit nga lugar.
Narekober naman ang nagkalain-lain nga kagamitan pang-giyera, mga armas, Granada, mga magazine, mga bala, kag subersibo nga dokumento subong man mga war materials.
