KORONADAL CITY – Ginkumpirmar sang Isulan Municipal Health Office nga nalatnan sang covid-19 virus ang nagtaliwan nga 61 anyos nga manunudlo halin sa bata sini nga frontliner.
Ini ang ginpahayag ni Nurse Risa Jen Alpas, municipal surveillance officer sa interbyu sang Bombo Radyo Koronadal.
Apang ginpahayag sini nga padayon pa nila ini nga ginaimbestigaran angot diri.
Nakabatyag suno pa sang hilanat kag sip-on ang nasambit nga indibidwal samtang pakadto ini sa buluthoan gani gin-abisuhan na lamang siya nga magpauli kag magpahuway.
Magluwas diri, nagalab-ot sa kapin 170 ang mga nakasulapo sini humalin sadtong Agosto 1 sang nagbisita ini sa buluthoan, nagtambong sa kasal, nagkadto sa mall kag sa mga himata sini.
Nahibaloan nga sa nasambit nga mga close contacts, apat sa mga ini ang nakaangkon sang reaksyon sa rapid test gani ginpaidalom gilayon sa quarantine procedures ang mga ini.
