KORONADAL CITY- Ginpasakaan na sang kaso nga murder ang suspek sa pagluthang patay sa isa ka human rights worker sang BARMM kag habal-habal driver sa Cotabato City.
Sa interbyu sang Bombo Radyo Koronadal kay Police Colonel James Gulmatico, hepe sang Criminal Investigation and Detection Group Bangsamoro Autonomous Region in Muslim Mindanao o CIDG BARMM, makaligad nila nga ginkustodiya ang suspek nga si Nasif Abdullah, 25 anyos gilayon naman ini ginpasakaan sang kaso makaligad nga luthangon patay sanday Archad Ayao, 28 anyos BARMM human rights worker kag ang habal-habal driver nga si Pio Orteza, 42 anyos sa Brgy. Rosary Heights 4, Cotabato City.
Madumduman nga gin ako ni Abdullah nga siya ang nagpatay sa duha ka biktima kun sa diin targe lamang sini ang habal-habal driver nga si Orteza makaligad suno pa ini nga buyayawon bangud sa away sa trapiko kag nadalahig lamang ang human rights worker.
Bangud sa pag ako ni Abdullah sa nasambit nga krimen ginakabig na ini nga case closed.
