KORONADAL CITY- Ginapreparahan na sang PNP PDEA kag AFP sa rehiyon 12 ang magasunod nila nga tikang angot sa mga impormasyon nga ginbuyagyag sa ila sang nagsungka nga drug lord nga si Jayton Kamsa sa probinsya sang Sultan Kudarat.
Nahibaluan nga ginalauman na ang pagpatigayon sang anti-illegal drug operation sa nagkalain-lain nga probinsya sa rehiyon 12 makaligad nga magsungka si Kamsa.
Suno kay Sultan Kudarat Police Provincial Director James Gulmatico, tuman ka importante ang mga impormasyon nga ila nakuha sa nagsungka nga drug lord ilabi na ang mga pangalan nga sang nakatransaksyon sini nga ginakabug-usan sang mga dalagkuan nga mga personalidad nga ila mangin target sa magasunod nga operasyon.
Kaangot sini, ginatutukan man ang gina siling nga drug laboratory nga ginpatukod ni Kamsa sa rehiyon 12 partikular na sa banwa sang Bagumbayan para sa iligal nga aktibidad sini.
Si Kamsa ang nahibaluan nga anay myembro sang Maguindanao PNP kag nagsulod sa iligal nga hilikuton, nangin most wanted person sa probinsya kag ginkabig nga drug lord bangud sa koneksyon sini sa mga ginakabig nga big fish sa illlegal drug trade.
Sa pagsungka sini ginalauman nga mahagan-hagan ang illegal drug proliferation sa rehiyon.
Kun madumduman nga si Kamsa ang nagsungka sa banwa sang Bagumbayan Sultan Kudarat sa pakigbuligay sang iya himata kag mas ginpabaskog na intelligence information gathering sang mga otoridad kun sa diin yara na ini sa kustodiya sang
Sultan Kudarat PNP para sa nagakaigo nga disposisyon.
