KORONADAL CITY- Pagasang-atan na sang kaso nga paglapas sa Section 5 at 11 sang Article II sang RA 9165 o Comprehensive Dangerous Drugs Act of 2002 ang 4 nga indibidwal nga target sang mga otoridad sa ginpatigayon nga anti-illegal drug operation sa Obra Subdivision , Barangay Griño, Tacurong City.
Sa interbyu sang Bombo Radyo Koronadal kay Police Superintendent Joefel Siason, hepe sang Tacurong City PNP, ang target sang operasyon amuh sanday Jude Dela Cruz, 35 anyos isa ka negosyante , Zenaida Teves 40 anyos wala sang trabaho, Joemar Gregorio 33 anyos wala sang trabaho kag Joey Paciente 37 anyos wala sang trabaho kag mga residente sang nasambit nga lugar.
Sa ginpatigayon nga operasyon, narekober sa posisyon sang mga suspek ang yara sa 51 gramo sang shabu nga nagabalor sang P255,000.00 kag mga drug paraphernalia.
Nahibaluan nga ang mga suspek ang notoryus sa pagpalapnag sang iligal nga droga sa nasambit nga lugar kag ginakabig nga untouchables ang mga kaugalingon bangud sa pagpakuno-kuno nga mga PDEA kag PNP assets.
Sa karun yara na sa PDEA 12 detention facility ang nasambit nga mga suspek.
