KORONADAL CITY – Tuman ang pagkadismaya kag kaakig sang mga konsehal nga nagtambong sa isa ginpatigayon nga piniliay kaangot sa pagtililipon sang mga ini sa Philippine Councilors League (PCL).
Kasubong nga isa ka circus man ang nagluntad bangud pila sa mga indi makahulat nga mga konsehal ang ginsaka pa ang stage kag gin-agaw ang mikropono sang banda nga nagatukar.
Sa interbyu sang Bombo Radyo Koronadal kay Councilor Junette Hurtado, indi suno pa nila mabasol ang ginhimo sang pila ka mga konsehal labi na nga kadam-an sa ila ang nagikan pa sa nagkalain-lain nga bahin sang pungsod agud magtambong sa nasambit nga aktibidad apang nausik lamag ang ila tion kag kwarta sang katawhan.
Dugang pa sini nga wala pa sila nakakaon kag kapoy na sa madugay nga oras sa pagtindog sa ila nga pila.
Ginsaysay pa ni councilor Hurtado nga wala man sila sang may mabaton nga anuman nga updates bangud wala sang opisyal nga nagahatag sang impormasyon kaangot sa ginapatigayon nga piniliay.
Nagpauli naman ang iban nga konsehal bangud sa kakapoy, kagutom kag pagkadismaya.
Takna alas 8 sang gab-i sang gindeklarar ang failure of elections nga ginkaugot sang kadam-an.
