KORONADAL CITY – Ginatumod na sa subong sang Philippine Army kun ano nga grupo ang nagapanag-iya sang nagkalain-lain nga mga armas makaligad ini nga nasapwan sang mg kasuldadohan sa isa ka barangay sa banwa sang Matalam, North Cotabato.
Base sa impormasyon nga nakuha sang Bombo Radyo Koronadal, nakit-an sang mga katapo sang 90th Infantry Battalion ang nagkalain-lain nga mga armas nga ginalakipan sang M-16 rifle, Garand rifles, kag duha ka kalibre 45 nga pistola.
Nakit-an suno pa sang mga suldado ang nasambit nga mga armas makaligad ginpahibalo sa ila sang pila ka mga concerned citizens ang nasambit nga mga armas.
Ginasiling nga ang mga nagapanag-iya sang mga ini ang miyembro sang isa ka armado nga grupo kun sa diin nagapangayo sila sang protection money halin sa mga mangunguma.
Sa subong, ginmando ni 6th Infantry Division commander Major Gen. Juvymax Uy sa iya mga kasuldadohan nga pahugtan pa ang pagbantay sa ila nasakupan agud malikawan ang anuman nga extortion activities ukon kalakasan nga pagahimoon sang mga lawless groups.
