KORONADAL CITY – Nagatalalangison tubtob sa karon ang pamilya sang menor de edad nga iloy nga napatay matapos nga maghikog paagi sa pag-inom sang hilo samtang ginasaysay ang natabo sa biktima.
Ini matapos nga nahaya naman subong sa ila panimalay ang bangkay sang 15-anyos nga iloy matapos nga wala mahingagaw nga mabulong sang gindala sa South Cotabato Provincial Hospital.
Suno kay Ginang Divina, utod sang biktima, makapila ka beses nga naghana nga maghikog ang iya manghod antes ini tigayon nga ginbawian sang kabuhi kag nabilin ang 21-diyas nga baby sini.
Madugay na suno pa nila nga ginabantayan ang iya nga utod bangud maka-3 ka beses na ini nga naghana nga mag-hikog apang napunggan nila.
Dugang pa sini na na-depress ang iya nga utod bangud sa masami nga paglaygay sa iya nga ginakabig naman sini nga sermon kag akig sang iya iloy.
Bangud sa tuman nga depression, nakit-an pa nila nga ginasakit man sang biktima ang iya bag-o bun-ag nga lapsag rason nga ginkuha ini sang iya iloy.
Tuman ka damo sang problema suno pa nga ginahuna-huna ang biktima lakip na ang amay sang baby sini rason nga nahimo sini ang paghikog.
Apang, wala suno pa sila nagkulang sa paglaygay sa iya bangud palangga nila ini kag indi man kuntani nila gusto nga matabo ini sa iya.
Nahibaluan nga si Divina mismo ang nakakita sa iya utod nga nakainom na sang hilo apang nagapapugong pa ang menor de edad nga dal-on ini sa hospital rason nga nadelatar nga madala gilayon sa South Cotabato Provincial Hospital kag tigayon nga ginabawian sang kabuhi.
Ginpakigbahin man sang utod sini nga ila makit-an sa sulod sang lungon ang biktima nga nagaluha nga palatandaan suno pa nga naghinulsol man ini sa iya ginhimo, apang ulihi na ang tanan.
Sa subong, nagapanawagan ang pamilya nga ipangamuyo ang napatay kag kun sin-o man ang may mahumok nga kasing-kasing nga maghatag sang bulig sa ila, pasalamatan nila sang dako.
