Ginpanindugan sang nagdaug nga Purok Chairman sa ginpatigayon nga eleksyon sang Purok G Morillo, Barangay Sta. Cruz sang gindeklarar siya nga daug sang Pebrero 28, 2026.
Sa interview sang Bombo Radyo Koronadal kay Romeo Porazo – nagdaug nga Purok Chairman sang Purok G Morillo, Barangay Sta. Cruz, ginpahayag niya nga ginbase ang iya pagdaug sa boto sang mga pumuluyo sang purok kag ginakwestiyon niya ang election protest nga ginpasaka ni anay Chairman Liza Humadiao.
Ginpahayag ni Porazo nga wala siya nagapati sa alegasyon nga may “flying voters” nga nagboto pabor sa iya, kag ginpabutyag niya nga ang resulta sang eleksyon nagapakita sang tinuod nga kabubut-on sang mga botante.
Sa pihak nga bahin, ginpahayag sa petisyon ni Humadiao nga may mga botante nga indi rehistrado sa Purok Morillo nga nakaapekto sa resulta sang botohan, rason nga ginpangayo niya ang pag-disqualify sang pila ka boto kag pagdeklarar sa iya nga nagdaug.
Bangud sini, nagpasalamat man si Porazo sa bug-os nga suporta sang mga pumuluyo sang purok kag nagpanawagan kay Humadiao nga batunon na lang ang resulta sang iya pagkadaug bangud ini lehitimo kag matuod-tuod.
Sa karon, padayon sa gihapon nga ginahulat ang pinal nga desisyon sa kaso samtang nagapabilin nga mainit ang isyu sa liderato sang purok.
