KORONADAL CITY – Nagaapela sang bulig ang mga nagbakwit nga residente sang Brgy Tukanalugong sa banwa sang Datu Abdullah Sangki, Maguindanao nga buligan sila sang gobyerno kasunod sang nagluntad nga engkwentro sa tunga sang duha ka kumander sang Moro Islamic Liberation Front (MILF) kag Moro National Liberation Front (MNLF).
Sa interbyu sang Bombo Radyo Koronadal, ginkilala ni 6th ID spokesperson Capt. Arvin Encinas ang magkasumpong nga grupo nanday Kumander Eping Ampatuan sang MNLF 106th Base Command batok sa grupo ni Kumander Datu Aldrix Saling sang MILF kun sa diin away sa duta ang ginatudlo nga rason sang engkwentro.
Ginpasiguro naman sang opisyal nga wala sang spillover nga matabo sa nasambit nga kinagamo.
Una nga ginpahayag sang isa sa mga evacuees nga si Saudi Magpig nga naglab-ot na sa kapin 200 ang nagbakwit bangud sa kinagamo kag isa na suno pa ang namatay sa bahin ni Kumander Aldrix.
Madumdoman nga ginpahayag ni Pangulong Rodrigo Duterte sa iya address to the nation kahapon nga kinahanglan nga mapatuman sang maayo ang Bangsamoro Organic Law bangud kun indi, magaresulta ini sa kaakig kag kinagamo sang kautoran naton nga mga Moro.
