KORONADAL CITY – Nasapwan nga wala na sang kabuhi ang isa ka Senior Citizen nga una nga ginreport nga nadula sang Enero 17, 2026 sang iya pamilya sa Barangay San Roque, Koronadal City.
Ini ang ginkumpirmar sa Bombo Radyo Koronadal ni Barangay Kagawad Kagawad Saludio Macul Jr sang Brgy. San Isidro, Tampakan kag Jimmy Gonzales Manano isa ka myembro sang Barangay Police Action Team (BPAT) ang una nga nagresponder sa nasapwan nga patay nga lawas sang tawo.
Suno kay Kagawad Macul, ang una nga nakakaita sang bangkay amo si Mister Maso nga naglawig sang kabayo malapit sa suba.
Ginkumpirmar man mismo sang pamilya sang biktima paagi sa pagchekyar sang SOCO nga ini amo ang nadula nga si Roy Layson, 65-anyos nga nadula sa sulod na sang lima ka adlaw.
Antes pa man nasapwan nga patay na, nakit-an nga nagasuksok sang puti nga t-shirt, itom nga shorts kag itom nga kalo nga nagalakat sa dalanon sang Barangay San Roque.
Samtang, ginakasubo sang mga otoridad nga nasapwan ini nga yara na sa state of decomposition.
Una diri nagtanyag pa sang reward money ang pamilya ni Layson sa sin-u-man nga makakita sa iya matapos nga madula sang pila na ka adlaw.
Nahibaluan nga pasado alas-7 kaina sang aga sang nasapwan ang bangkay sang biktima nga isa man ka Person with Disability ukon PWD.
