KORONADAL CITY – Naglab-ot na sa 203 ka indibidwal ang natikma sang Koronadal PNP nga nagbayolar sa ginapatuman nga curfew sa tunga sang extended calibrated lockdown sa probinsya sang South Cotabato kag enhanced community quarantine sa syudad sang Koronadal.
Sa interbyu sang Bombo Radyo Koronadal kay PCapt. Randy Apostol, deputy chief of Police sang Koronadal PNP, kadam-an suno pa sa 203 nga mga natikma nga nagbayular sa curfew humalin alas 7 sang gab-i tubtob alas 5 sang aga ang lunsay gikan sa downtown area.
Pila man suno pa sa mga natikma ang mga menor de edad.
Ang nasambit nga datos ang napagkit humalin Marso 21, ang pag umpisa sang quarantine checkpoint tubtob Abril 6.
Suno kay Apostol, ila nga ginpaidalom sa educational apprehension ukon pagpahanumdum sa mga nagbayolar bag-o pagabuy-an takna alas 5 sang aga.
Panawagan sini sa mga ginikanan nga buligan kontane sila nga mga frontliners pinaagi sa pagpabilin sa tagsa ka panimalay.
