KORONADAL CITY – Tigayon na nga ginbawian sang kabuhi ang 12 anyos nga bata nga lalaki nga na-comatose kag gin-refer sa Southern Philippine Medical Center (SPMC) sa siyudad sang Davao.
Ini ang ginkumpirmar ni Leonardo Ballon, ang MDRRMO sang banwa sang Surallah, South Cotabato sa interbyu sang Bombo Radyo Koronadal.
Suno kay Ballon, wala na nasalbar sang mga doktor si Randave Ayupan bangud sa kritikal nga kondisyon sini.
Emosyunal naman nga ginpakigbahin ni Danica Ayupan, utod ni Randave ang ginhimo nga pagbato sa kamatayon sang iya utod.
Suno kay Danica, alas-12:50 kaina sang kaagahon sang ginbawian sang kabuhi ang iya utod.
Ginpaathag sang mga doktor nga naglapta na ang dugo sa utok ni Randave kag indi na masarangan nga ipaidalom sa operasyon ang biktima.
Kaangot sini, nagsaka na sa 21 ang napatay sa nagluntad nga maduguon nga aksidente sa dalan sa Barangay Lamsalome, Tboli, South Cotabato sang Setyembre 17.
Madumdoman nga una na nga napatay ang amay, iloy, kag utod ni Randave.
