KORONADAL CITY – Ginakabig nga madinalag-on sang mga Moro Islamic Liberation Front ang ginpatigayon nga Bangsamoro Consultative Assembly sa Camp Darapanan, Sultan Kudarat Maguindanao.
Ini makaligad nga nangin positibo ang panan-awan sang mga Muslim leaders sa kaundan sang Bangsamoto Organic Law.
Suno sa record sang seceratariat naglab-ot sa halos 100 libo ang nagtambong nga mga partisipante nga suportado ang BOL.
Mahibaluan nga gintalakay sa nasambit nga malapnagon nga pagsinapol ang mga kaundan sang BOL nga ginpirmahan na bilang layi ni Pangulong Duterte makaligad nga ratipikahan sang mga mamalidha sa senado kag kongreso.
Ginpa-athag man ni Bangsamoro Transition Commission Chair Mohagher Iqbal ang nangin dalagan sang peace talks sang MILF sa gobyerno.
Ginsambit man sini ang mga natalana nga matabo ilabi na nga tigayon nga nangin layi ang BOL.
Nagpahayag naman sang pagsuporta sa BOL ang nagkalain-lain nga sektor nga nagtambong sa nasambit nga assembly.
Kaangot sini, nagpasalamat naman ang mga Muslim leaders sa adminstrasyon ni Duterte kag sa mga mamalidha.
Kadungan sini, nagpanawagan ni MILF 1st Vice Chairman Ghadzali Jaafar sa tanan nga pumuluyo sang Bangsamoro region nga suportaran ang BOL kag ang itukod nga Bangsamoro Autonomous Region in Muslim Mindanao ukon BARMM.
