KORONADAL CITY – Kaugalingon nga inisyatibo sang grupo sang mga artist sa probinsiya nga kilala bilang KUDLIT South Cotabato ang naghimo sang isa ka makahulugan kag matahum nga “mural painting” sa pader nga sakop sa kapitolyo sang South Cotabato kadungan sang selebrasyon sang World Environment Day sa Hunyo 5,2024.
Ini ang ginpakigbahin ni Mr. Dodz McBaldz, ang presidente sang KUDLIT South Cotabao sa interview sang Bombo Radyo Koronadal.
Suno kay Dodz, ang output sang mural painting ang kolaborasyon sang masobra 20 ka mga artist nga nagapang-edaron sang 14-anyos tubtob 73-anyos.
Isa ka group effort ang nadihon sa conceptualization sang mural nga may tinutuyo nga e-promote ang paghatag importansiya sa environment kasubong sang pagpananum sang mga puno sang kahoy kag madamo pa.
Dugang pa sini, ang adbokasiya sang grupo ang naga-promote sa paghatag sang message sa tawo agud nga pangapinan ang aton environment.
Nahibaluan nga ginhimo sang grupo ang mural painting sa sulod lamang sang duha ka adlaw.
Kaangot sini, ginaawhag man sang grupo ang mga may talent sa painting ukon artists nga mag-upod man sa ila agud magamit ang talento sa mga maayo nga adbokasiya sang ila nga grupo.
