KORONADAL CITY – Yara na sa kustodiya sang mga otoridad ang isa ka municipal councilor kag duha pa ka kaupdanan sini matapos nna makuhaan sang mga high powered firearms.
Ginkilala ni PSupt. Joefel Siason, hepe sang Tacurong City PNP ang mga naarestar nga sanday Datu Norie Maulana Mamalo, 46 anyos,may asawa kag Konsehal sang Sultan Sa Barongis Maguindanao; Zams Kamal Musaiden, 27,mangunguma kag Reyno Silongan Legawan 41 nga lunsay residente sang nasambit nga lugar.
Suno kay Siason, nagpatigayon sang hugot nga checkpoint ang mga otoridad sa lugar sang mag agi ang isa ka unit sang Toyota Vios Sedan duag silver nga may plate number. KCW 911 kag sang ginbuksan ang salakyan diri na kag natukiban ang mga armas luthang nga dala sang mga ini.
Ginhingyuan sang papeles ang mga ini apang wala sila sang may mapakita.
Magapangatubang naman sa kaso nga paglapas sa RA10591 ang mga nakuhaan sang armas luthang.
