Ginhatagan importansya sang business community ang mas mabaskog nga suporta para sa micro, small and medium enterprises (MSMEs), ilabi na bangud sa paghinay sang pagtubo sang ekonomiya.
Sa interview sang Bombo Radyo Koronadal, ginpahayag ni Atty. RJ Sustiguer, presidente sang Integrated Bar of the Philippines, nga kinahanglan sang mga negosyante sang mas klaro nga direksyon kag praktikal nga mga solusyon halin sa gobyerno para sa ila mga negosyo kag operasyon.
Suno kay Sustiguer, kinahanglan mahibaluan sang mga negosyante ang mga prayoridad sang administrasyon agud makadesisyon sila sang husto bahin sa ila mga pamuhunan.
Gindugang niya nga natalakay sa State of the Nation Address (SONA) ni Pangulong Ferdinand “Bongbong” Marcos Jr. ang nagkalain-lain nga isyu nga may kaangtanan sa ekonomiya, lakip na ang energy concerns, posible nga epekto sang tensyon sa Middle East, kag ang investment commitments nga nakuha sang Pangulo sa iya mga pagbisita sa iban nga pungsod.
Suno pa sa iya, indi lamang dapat nakasentro ang mga programa sang gobyerno sa ayuda, sa baylo kinahanglan man sang mga estratehiya nga makapalig-on sa pribado nga sektor kag makahatag sang dugang nga oportunidad para sa negosyo.
