KORONADAL CITY – Ginbawian sang kabuhi ang isa ka motorista matapos nga mabunggo ang ginamaneho nga motorsiklo sa nakaparking nga isang elf truck sa barangay road sakop sang Brgy. San Isidro, Koronadal City, alas 10:55 sang Sabado sang gab-i, Oktubre 4, 2025.
Ginkilala sang mga otoridad ang biktima nga si Joselito Callo Alabata Jr., 33-anyos, may asawa kag residente sang Brgy. Zone 3, Koronadal City.
Sa interview sang Bombo Radyo Koronadal kay PCMSGT. Gandi Basan, head sang Traffic Section sang Koronadal City PNP, ginamaneho sang biktima ang Yamaha Aerox nga motorsiklo sini halin sa Brgy. San Isidro padulong sa direksyon sang City Public Integrated Terminal sang mabunggo sa nakaparking nga elf truck.
Bangud sa kabaskog sang impact, wasak ang atubangan nga bahin sang motorsiklo samtang nag-angkn sang malala nga pilas sa lawas ang biktima.
Gilayon pa ini nga nadala sa South Cotabato Provincial Hospital apang ginbawian na sang kabuhi.
Nahibalaun nga wala sang nakabutang nga warning device sa lugar kun sa diin nakaparking ang truck nga may guba nga nabungguan sang biktima.
Sa karon, natalana nga mag-atubangay ang pamilya sang napatay kag ang nagapanag-iya naman sang elf truck.
Bangud sa panibag-o nga aksidente, liwat naman nga nagpahanumdon ang mga otoridad sa mga nagamaneho, indi lamang sang motorisklo kundi sang anuman nga salakayan nga mangin mahalong agud makalikaw sa aksidente.
