KORONADAL CITY – Ginpangunahan sang mga local officials kag sang simbahan ang pag-welcome kay Father Terisito Chito “Tisoy” Suganob matapos nga nag-abot ini kahapon sa iya nga hometown sa Barangay Poblacion, Norala, South Cotabato.
Una nga ginpatigayon ang motorcade alas-8 kaina sang aga nga ginsundan sang misa nga ginpangunahan mismo ni Father Chito nga gintambungan sang mga himata sini, mga malapit nga abyan, mga kaingod kag mga pumuluyo sang nasambit nga lugar.
Matapos sini, ginpatigayon man ang programa sa Municipal gym sang Norala kun diin nangin highlight sang programa ang pagsaysay ni Fr. Chito sa iya nangin eksperiensiya sa sulod sang 115 days sa kamot sang Maute-ISIS sa kasagsagan sang Marawi siege.
Ginpaagi pa sa lahog kag pagpakadlaw ni Fr. Chito ang pagsaysay sang iya mapait nga eksperiensiya kaupod pa ang iban nga mga survivors nga nangin bihag man sang mga Maute-ISIS group.
Kadungan sini, lubos man nga ginpasalamatan ni Fr. Chito ang Roman Catholic church, mga obispo, kaparian, religious leaders kag tanan nga nagpanagmuyo para sa iya kaluwasan.
Aminado siya nga sang yara siya sa kamot sang Maute-ISIS kag yara pa sa war zone, wala niya ginalauman nga mabuhi pa.
Apang, bangud suno pa sa hugot nga pangamuyo kag pagsalig sa Diyos rason nga nabuhi siya kag ang iban pa nga mga survivors sa Marawi crisis.
